Pri / Price: $10.00

Click to set custom HTML

THE AUTHORS / OTÈ YO

PAUL A. BELONY, Ph.D

Picture
Pwòfesè Paul André Junior Belony se yon fizisyen epi yon edikatè ayisyen natif natal k ap travay oz Etazini. Li fè doktora li nan inivèsite Lehigh (nan Bètleyèm, Pennsilvani) kote l te konsantre rechèch li sou fizik plasma nan limit ki depase kad ideyal. Tit tèz doktora li a se: « Sinetik Emisyon Vapè nan Lizyè Eksplozyon Fil Elektrik ». Ekspètiz li se nan plasma ki gen dansite ki wo anpil, fabrikasyon sikui pou sistèm ki gen puisans ki wo anpil, espektwoskopi, lazè, ak enfòmatik. Pwòfesè ​Belony se lidè pwogram fizik nan Inisyativ MIT-Ayiti kote l ap travay sou aprantisaj aktif ki kore ak teknoloji an kreyòl. Nan pwogram sa a, Pwòf. Belony anime plizyè atelye kote l prezante divès zouti pratik pou laboratwa fizik ak demonstrasyon nan klas.
Pwòfesè Belony se fondatè e prezidan Belony Scientific LLC, kote li travay sou devlopman zouti pou pwodiksyon enèji ki renouvlab ak agrikilti ki entegre.

Michel DeGraff, Ph.D

Picture
​Pwofesè Michel DeGraff se yon Ayisyen natif natal.  Li se pwofesè lengwistik nan Massachusetts Institute of Technology (MIT) depi 1996.  Se an 2010 li fonde Inisyativ MIT-Ayiti http://haiti.mit.edu.  Li entegre Akademi Kreyòl Ayisyen (AKA) an desanm 2014 lè AKA te inogire.  Pifò nan rechèch lengwistik li se sou devlopman ak chapant lang kreyòl. Kòm youn nan Grenadye sa yo k ap dirije Inisyativ MIT-Ayiti a, rechèch syantifik li vin makonnen ak itilizasyon lang kreyòl la kòm youn pami twa « wòch dife » k ap kore modènizasyon ak demokratizasyon edikasyon ann Ayiti. Lang kreyòl la se poto mitan k ap ranfòse fondasyon, idantite lengwistik e kiltirèl ansanm ak souvrènte peyi d Ayiti. De (2) lòt wòch dife Inisyativ la se pedagoji patisipatif ak resous modèn (tankou teknoloji) pou edikasyon.  Objektif Inisyativ MIT-Ayiti a se fè bèl kalte edikasyon vin aksesib pou tout etidyan ann Ayiti — tou patou, nan tout klas sosyal.    An final, nan analiz Pwofesè DeGraff, lang kreyòl la se yon zouti ki nesesè pou konesans, libète, jistis ak devlòpman ann Ayiti.

Glenda S. Stump, Ph.D

Picture
​Doktè Glenda Stump se yon edikatè k ap fè rechèch sou edikasyon.  Travay li nan Massachusetts Institute of Technology (MIT) travèse plizyè disiplin. L ap travay nan Abdul Latif Jameel World Education Lab (http://jwel.mit.edu) ki se yon laboratwa pou amelyore edikasyon tou patou sou latè beni.  Se nan wòl sa a li patisipe nan divès pwojè entènasyonal kote teknoloji ranfòse ansèyman Syans, Teknoloji, Enjeniri ak Matematik (S.T.En.M.) ansanm ak fòmasyon anseyan.  Nan fouye zo nan kalalou nan syans edikasyon, Doktè Stump fè rechèch sou motivasyon etidyan, teyori pedagoji ak metòd ansèyman.  Li menm ak kòlèg li fèk patisipe nan piblikasyon 2 atik syantifik : « Translating the ICAP Theory of Cognitive Engagement Into Practice » (sou divès mòd aprantisaj : entèraktif, fabrikatif, aktif, pasif) epi « An n bati lekòl tèt an wo : Lang manman, pedagoji ak teknoloji kòm engredyan fondal natal pou yon chanjman radikal » (sou chanjman nan atitid anseyan sa yo k ap patisipe nan atelye Inisyativ MIT-Ayiti yo). Se travay Glenda Stump sou aprantisaj, motivasyon ak fòmasyon anseyan ki mete jèvrin nan piblikasyon li yo sou pedagoji ak evalyasyon.