Dezan apre tranblemanntè a, Sacha ki se sèl moun nan fanmi an ki ta sanble te rete vivan apre trajedi a, te dekouvri modpas sè li. Li te sezi wè Sofya te konn sèvi ak foto li pou li te atire Djonnsonn. Sacha te mete tout odas li deyò pou li te fè tèt li pase pou Sofya. Jennonm nan ki pa te vle rate okazyon an ankò, te blije ale Ayiti. Se vre, li te genyen anpil dout sou moun li te wè a; men sèvèl li pa te fin twò klè pou li te konprann jwèt la. Li te sèvi avèk Sacha tankou se te Sofya. Lè Djonnsonn te vin konnen Sacha se ti sè Sofya, li te kriye tankou yon ti bebe ; men, sa pa te chanje lanmou ak santiman ki te nan fon kè li.

De mwa apre jenn gason an te retounen nan peyi Etazini, li te pran nouvèl Sacha ansent. Yon nouvèl ki te pote anpil espwa ak kontantman nan kè ti malere a.

Èske li pa te gen tan twò ta pou Djonnsonn chanje lavi li? Èske lanati pa te fèk kòmanse avèk misyon li? Èske Sacha te rete vivan pou yon rezon nou poko konnen? Èske Goudougoudou te fèk kare rete sou chimen yo? Èske rankont mesyedam sila yo ka pote yon chanjman nan peyi Ayiti? Antouka, an nou pran ti chèz ba nou, epi nou va swiv.


Title: Goudougoudou ou chimen nou
Author: Garry Dossous
Trim size: 5.5 X 8.5 
Pages: 158 pages
ISBN: 0-9908554-4-9

---